Биылы белгіленіп, жасақталып жатқан көптеген жобалық-сметалық құжаттамалар Жарсуат округіне қарасты дауылпаз ақын Махамбет Өтемісұлы жатқан «Қаройды» да қамтымақшы.

«Қазақстанның киелі жерлер» картасына енген қасиетті мазарға тағзым етіп келушілерге арналып, арнайы танымдық-демалыс орындары салынады екен. Оның жайын қорық директоры Сәрсенбай Дәуітбаевтан сұрағанымызда:

-Батыр-ақын мазарынан шамамен 300 метрдей қашықтықта үш қазақы киіз үй іспеттес орындар бой көтереді. Оның бірі қонақ үйі, дәмхана және мұражай-конфернц залға лайықталады. Сонымен қатар ол орындарға электр желісі тартылып, жылыту, тамақ дайындау, су тартылып, абаттандырып, жасыл желектер отырғызылады,-деді Сәрсенбай Меңдіғалиұлы.

Сондай-ақ бұл орынға жөнделмекші болып жатқан Индер-Қарабау жолы бойындағы Кетебай елді мекені арқылы жол тартылып, суды 8 шақырым жердегі «Алғабас-Жорық» каналы бойындағы котлованнан құбыр арқылы алу жайы ойластырылып жатқанын жасырмады.

Несі бар, ойластырылып жатқан игілікті іс сәтімен басталып, қаржысы жеткілікті бөлініп, сапалы әрі тиянақты атқарылсын демекпіз.

С. ХАЛЫҚОВ.

Жарсуат округі.