Ауданның 90 жылдық мерекесі қарсаңында аудан әкімі Серік Арыстан Көктоғай ауылында тұратын Екінші дүниежүзілік соғыстың ардагері Жұмабай Жұмашевты құттықтай барып, «Индер ауданының Құрметті азаматы» атағының белгісін табыс етті.

Жұмабай Жұмашев І-ші Украина майданының 65-атқыштар полкының құрамында Украинаны азат ету ұрыстарына қатысқан. Оқ пен оттың ортасынан аман-есен келгеннен соң ұзақ жылдар сауда саласында абыройлы қызмет атқарған. Ауданның Құрметті азаматы мәртебесіне ардагерді өткен аудандық мәслихат сессиясында депутаттар бірауыздан қолдаған еді. Кездесу барысында аудандық мәслихат хатшысы Бағдат Сапаров пен аудандық ардагерлер алқасының төрағасы Өтеп Нұриев құттықтап, ақ тілектерін білдірді. Ардагер зор құрметке ризашылығын білдіріп, ақ батасын берді.

С.САНСЫЗБАЙҰЛЫ.

Көктоғай ауылы.