Жалпыұлттық коалиция мүшелері Павлодар облысының алюминий кластері мен энергетикалық кәсіпорындары өкілдерімен мазмұнды кездесу өткізді. Зауыт мамандары жаңартылған Конституция жобасындағы елдің өнеркәсібінің дамуына тікелей әсер ететін жаңашылдықтарды талқылауға белсенді қатысты.
Ата заңның жаңа редакциясының негізіне Президент Қасым-Жомарт Тоқаевтың Әділетті Қазақстан құруға бағытталған ұсыныстары енгізілген. Ондағы «Адал азамат», «Заң мен тәртіп» және «Таза Қазақстан» секілді негізгі бастамалар әлеуметтік әділеттілікті қамтамасыз етуге, азаматтардың заң алдында теңдігін орнатуға және елдің экологиялық қауіпсіздігін нығайтуға бағытталған. Бұл бағыттар конституциялық реформаның стратегиясын айқындап, оған нақты практикалық мән берді.
Талқылау барысында Коалиция мүшелері павлодарлық өндіріс саласы қызметкерлерінің назарын еңбек адамының мүддесін қорғау мәселесіне аударды. Жобада жұмыс орындарының қауіпсіз жағдайлары, әділ және кемсітусіз еңбек ақы төлеу, сондай-ақ заңға сәйкес әлеуметтік қорғау нормалары бекітілген. Мемлекет минималды әлеуметтік стандарттарды қамтамасыз етуге және жұмыспен қамтуды қолдауға міндеттеме алады. Өндіріс саласының өкілдері атап өткендей, үлкен өндіріс орындары мен энергетикалық объектілер үшін бұл ережелер тікелей қолданбалы маңызға ие – олар өндірістік қауіпсіздік пен еңбек ұжымдарының тұрақтылығына тікелей байланысты.
Сонымен қатар жаңартылған Конституцияда азаматтардың қауіпсіз және қолайлы қоршаған ортаға құқығы мен мемлекеттің оны қорғау міндеті бекітілген. Бұл кәсіпорындарды экологиялық талаптарды орындауға және заманауи технологияларды енгізуге міндеттейді. Коалиция мүшелері енгізіліп отырған тұрақты даму қағидалары саланы жаңғырту үшін ұзақ мерзімді құқықтық негіз қалыптастыратынын атап өтті.
Жеке кәсіпкерлік еркіндігі, меншік құқығын қорғау және инвестициялық саясаттың тұрақтылығы туралы ережелер бөлек талқыланды. Мұндай ашық және түсінікті ережелер бизнестің сенімін нығайтып, ірі экспорттық жобаларды жүзеге асыруға жағдай жасайды.
Кездесу қорытындысы бойынша Павлодар облысының өнеркәсіп саласы өкілдері конституциялық өзгерістерді қолдайтынын және алдағы референдумда белсенді қатысуға дайын екенін білдірді.
