МЕМЛЕКЕТ БАСШЫСЫНЫҢ БАСТАМАСЫМЕН ҚОЛҒА АЛЫНҒАН «ТАЗА ҚАЗАҚСТАН» РЕСПУБЛИКАЛЫҚ ЭКОЛОГИЯЛЫҚ АКЦИЯСЫ АУДАНЫМЫЗДА ДА ҚЫЗУ ЖҮРУДЕ.
Мәселен кешегі бейсенбіде Жайық өзені жағалауында "Таза су айдындары" акциясы өтті. Акция барысында өзеннің оң және сол жақ жағалаулары қоқыстан тазартылды.
– Аталмыш акцияға Индер балық инспекция бөлімі, аудандық әкімдігінің ішкі саясат бөлімі, Жастар ресурстық орталығы қызметкерлері және «Индер Агро Строй Сервис» мекемесінен барлығы 30-ға жуық адам қатысып, 6 автотехника жұмылдырылды. Нәтижесінде 4 тонна тұрмыстық-қоқыс қалдықтары жиналып, қоқыс алаңына апарылып төгілді, – дейді аудандық балық инспекциясы бөлімінің бастығы С.Рысмағамбетов.
Ал ертесіне, яғни жұма күні Индербор кентінде ауқымды көалдандыру жұмыстары атқарылды.
Атап айтқанда Көктем саябағына, сондай-ақ Д.Қонаев, Тайсойған, Б.Айтимов және Махамбет көшелеріндегі жасыл желек аумақтарына 1000 дана терек, күл ағашы және үйеңкі ағаштары егілді. Индербор кенті әкімінің орынбасары Қайыржан Нұриевтың айтуынша, көшеттер ауданның жер асты байлығын игеруге сүбелі үлес қосып жүрген «INDERTUZ COMPANY» ЖШС- нің қолдауымен әкелінген екен.
Аталған шара өңірдің экологиялық жағдайын жақсартуға , елдімекеннің көрікін арттыруға және тұрғындар үшін қолайлы орта қалыптастыруға мүмкіндік берері сөзсіз.
«Таза Қазақстан» экологиялық акциясы аясындағы жұмыстар алдағы уақытта да жалғасады.
С.КӨШЕКОВ,
