Қызылжар ауылында 18 үй болса, оның маңындағы Ақтан ауылында бар жоғы 5 үй ғана орналасқан. Жарсуат ауылдық округіне қарасты Жайықтың жағасында орналасқан шағын ауыл тұрғындары мал ұстап, жеке шаруашылықтарымен кәсіп жасайды.

Шағын ауылдарға бірер жыл бұрын ауыз су тартылған еді. Тұрғындары енді ауа райының қолайсыз күндері облыстық трассадан көрініп тұрған ауылымызға жете алмай қиналамыз дейтін. Енді міне, шағын ауылға биыл асфальт жол да жетті.

Аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Бауыржан Иманғазиевтің айтуынша, барлығы 2950 метр жолды мердігер мекеме «Атырау жолдары» ЖШС жүргізді.

-Енді жол жиегіндегі нығыздау жұмыстары жүріп, тиісті жол белгілері қондырылатын болады.

Осылайша аудандағы шағын ауылдың өзі барлық қажетті инфрақұрылыммен қамтылып, тұрғындары игілігін көріп отыр.

Саламат БАЗАРБАЕВ