Қоғамдағы ең маңызды мәселелердің бірі – жол-көлік оқиғаларының алдын алу және жол қозғалысы ережелерінің сақталуы. Әсіресе, балалар мен жасөспірімдердің қатысуымен болатын жағдайлар алаңдатпай қоймайды. Сондықтан жолда қауіпсіздік сақтау – баршамыздың ортақ жауапкершілігіміз.
Күнделікті тіршілікте көше қиылыстарында бағдаршамның қызметі ерекше. Бағдаршам – көлік пен жаяу жүргіншілер қозғалысын реттейтін негізгі құрал. Қызыл – тоқта, сары – дайындал, жасыл – жүр деген қарапайым ережені әр бала мен ересек те жақсы білуі тиіс.
Мектеп жасындағы балалар көбіне жолда ойнап немесе абайсызда жол ережесін бұзуы мүмкін. Бұл – үлкен қауіптің көзі. Сондықтан ата-аналар мен мұғалімдер балаларға жолда жүру мәдениетін, бағдаршам мен жаяу жүргінші жолақтарының мәнін ерте жастан үйретуі тиіс.
Жол қауіпсіздігін сақтау үшін мына қағидаларды есте ұстау қажет:
- Бағдаршамның жасыл түсі жанған кезде ғана жолды кесіп өту;
- Жаяу жүргінші жолағымен (зебра) ғана өту;
- Құлаққап, телефон секілді алаңдататын заттарды қолданбау;
- Көлік жолына кенеттен жүгіріп шықпау;
- Көше қиылыстарында абай болу және екі жаққа қарап өту.
Мектептер мен балабақшаларда жол ережесіне арналған тәрбие сағаттары, семинарлар мен арнайы шаралар өткізу – балалардың қауіпсіздігін қамтамасыз етудің бір жолы.
Жол қауіпсіздігін сақтау – тек жүргізуші мен жаяу жүргіншінің емес, бүкіл қоғамның міндеті. Әр азамат жол ережесін сақтаса, көптеген қайғылы оқиғалардың алдын алуға болады. Есіңізде болсын, бір сәттік салғырттық үлкен қайғыға әкелуі мүмкін.
Түлкібас ауданы әкімдігінің баспасөз қызметі
