Қоршаған ортаны қорғаудың тиімді жолдарының бірі – көгалдандыру. Ағаш отырғызу мен жасыл желекті көбейту табиғаттың тепе-теңдігін сақтауға, ауаның сапасын жақсартуға және елді мекеннің көркін арттыруға ықпал етеді.
«Таза Қазақстан» акциясы аясында ауданымызда ағаш көшеттерін отырғызу және жасыл аймақтарды көбейту жұмыстары тұрақты түрде жүргізілуде. Бұл шараларға мемлекеттік мекемелердің қызметкерлері, жастар мен ауыл тұрғындары белсенді қатысып келеді. Әрбір отырғызылған көшет – болашаққа жасалған игі қадам.
Жасыл желек жаздың аптап ыстығында сая болып, ауаны тазартады. Сонымен қатар табиғаттың әсемдігін арттырып, тұрғындарға қолайлы орта қалыптастырады. Сондықтан көгалдандыру жұмыстары тек бір күндік науқан ретінде емес, тұрақты дәстүрге айналуы қажет.
Туған жердің табиғатын қорғау – келер ұрпақ алдындағы жауапкершілік. Бүгін егілген әр көшет ертеңгі ұрпаққа көлеңке мен таза ауа сыйлайды. Сондықтан жасыл ауыл қалыптастыру жолындағы игі істер жалғасын таба беруі тиіс.
