Тазалық – адам өміріндегі ең маңызды құндылықтардың бірі. Таза ортада өмір сүрген адам өзін жайлы сезінеді, денсаулығы да мықты болады. Сондықтан тазалықты сақтау әрбір азаматтың күнделікті міндетіне айналуы керек.
Бүгінде қоғамдағы тазалық мәселесі ерекше назар аударуды қажет етеді. Кейде көшелерде, демалыс орындарында немесе қоғамдық жерлерде қоқыстың шашылып жататынын көреміз. Мұндай көріністер қоршаған ортаның ластануына ғана емес, адамдардың мәдениет деңгейіне де әсер етеді. Тазалық мәдениеті адамның өзіне, айналасына және табиғатқа деген құрметінен басталады.Соңғы жылдары елімізде тазалықты насихаттауға бағытталған түрлі акциялар мен сенбіліктер ұйымдастырылып келеді. Бұл шаралар тұрғындарды қоршаған ортаны таза ұстауға шақырып, жауапкершілікті арттыруға ықпал етеді. Әсіресе жастардың осындай бастамаларға белсенді қатысуы қуантады. Себебі табиғатты аялау мен туған жердің тазалығына қамқорлық жасау – болашаққа жасалған игі қадам.Менің ойымша, тазалық сақтау тек сенбілік кезінде ғана емес, күнделікті өмір салтына айналуы тиіс. Әр адам қоқысты арнайы орынға тастап, өз ауласының, көшесінің тазалығына мән берсе, қоршаған орта да көркейе түседі. Тазалық мәдениеті қалыптасқан қоғамда тәртіп те, жауапкершілік те жоғары болады.
Қорытындылай келе, тазалық – өркениетті қоғамның белгісі. Туған жеріміздің тазалығына әрқайсымыз үлес қоссақ, болашақ ұрпаққа таза әрі көрікті ел қалдыра аламыз.
ӘСЕЛ ӘЛІБЕК,
студент
