Жастардың өмір жолында дұрыс таңдау жасаудың маңызы зор. Әсіресе есірткі сияқты адам денсаулығы мен болашағына үлкен қауіп төндіретін заттардан аулақ болу – әр адамның өзіне деген жауапкершілігінен басталады.
Қазір жастар түрлі ақпаратты интернеттен еркін алады. Осы мүмкіндікті пайдаланып, зиянды әдеттерді насихаттайтын жалған ақпарат пен қауіпті ұсыныстарға тап болуы мүмкін. Сондықтан кез келген күмәнді ұсынысқа еліктемей, оның салдарын алдын ала ойлау қажет. Қызығушылықпен немесе біреудің ықпалымен жасалған шешім адамның өзіне ғана емес, отбасы мен жақындарына да кері әсер етуі мүмкін.
Нашақорлықтың алдын алу тек құқық қорғау органдарының міндеті емес. Бұл бағытта ата-ана, мектеп, ұстаз, жастар ұйымдары және жалпы қоғам бірлесе жұмыс істеуі керек. Жасөспірімнің бос уақытын тиімді өткізуіне жағдай жасау, спортпен, өнермен, біліммен айналысуына қолдау көрсету – алдын алудың маңызды жолдарының бірі.
Әр жас өз болашағын өзі қалыптастырады. Денсаулықты сақтау, жақсы ортамен араласу, білімге ұмтылу және салауатты өмір салтын таңдау – жарқын келешекке бастайтын дұрыс бағыт. Сондықтан өмірге кері әсер ететін әдеттерге орын бермей, әр шешімге жауапкершілікпен қараған жөн.
Бір сәттік қызығушылыққа бола болашағымызды тәуекелге тігуге болмайды. Дұрыс таңдау жасауға әрқашан мүмкіндік бар.
Гүлбану Насиполла
