Елді мекеннің көркі оның ғимараттарымен ғана емес, көшелерінің, аулаларының және қоғамдық орындарының тазалығы мен жинақылығымен де бағаланады. Сондықтан Индер ауданында «Таза Қазақстан» бастамасы аясында жүзеге асып жатқан абаттандыру жұмыстарының мәні ерекше.
Қазіргі таңда аудан аумағында көшелерді ретке келтіру, шөп шабу, қоқыстарды жинау, қоғамдық орындарды тазалау сияқты жұмыстар жүргізілуде. Сенбіліктер кезінде түрлі мекеме ұжымдары мен тұрғындар бірлесіп, өз аумақтарын тазалауға атсалысып келеді. Бұл – елді мекеннің ажарын ашумен қатар, ортақ іске деген жауапкершіліктің көрінісі.
Абаттандырылған аумақ тұрғындардың игілігіне қызмет етеді. Таза көше, реттелген саябақ, жинақы қоғамдық орын – күнделікті өміріміздің жайлылығын арттыратын маңызды элементтер. Сондықтан мұндай нысандарды күтіп ұстау және тазалығын сақтау да назардан тыс қалмауы керек.
Ауданның көркеюі тек бір мекеменің жұмысына байланысты емес. Әр ұжымның, әр тұрғынның қосқан үлесі елді мекеннің жалпы келбетіне әсер етеді. Бүгінде атқарылып жатқан жұмыстарды жүйелі түрде жалғастырып, нәтижесін сақтай білу – ортақ міндет.
Абаттанған аумақ – халыққа жасалған қолайлы жағдайдың бір көрінісі. Сондықтан тазалық пен көркейтуге бағытталған жұмыстарды қолдап, туған жеріміздің ажарын бірге арттыра берейік.
Жанар Изимова
ихтиолог
