Атырау өлкетану мұжайының Индер бөлімшесінде ашылған «Дендер» -85 жыл сенімді серігіңіз» атты мазмұнды көрмесі ашылып, көп назарына ұсынылды.

Индер аудандық «Дендер» газетінің 85 жылдығына арналған облыстық және аудандық мұражайдың жылдық жұмыс жоспарына сай ашылған көрмеге 25 жәдігер жинақталған үш подьюм мен бір көрініс, 16 суреттік планшеттен көрермен көп тарихтың сырын ұға алады.

-Сонау 1934 жылдан шыға бастаған газет пен оның алғашқы редакторлары, тілші-авторлары, түрлі марапаттары мен альбомдар, «Құрмет кітабы» қойылған көрме осындағы бұдан бұрын аудан тарихы бөліміне қойылған жәдігерлердің қатарын толықтыра түсіп, келушілерді ерекше қызықтырып отыр,-дейді мұражай басшысы Майгүл Жалғасбаева.

Аудандық газет тарихымен алғаш болып танысқандар арасында индерліктермен қатар Махамбет, Қ.Абаханов атындағы орта мектептің шәкірттері мен ұстаздары да болғанын айту кеерк.

Ал бұл қатарда аудандық басылымның бас редакторы Жанай Амантурлин бастаған журналистер де болып, мұражай қызметкерлері қолға алған игі іске алғыс айтты.

Өлкетануда өзіндік орыны бар көрме бір апта бойына жұмыс істейді, аудан мен газет тарихын жақын тани түскісі келетін көрермендерін асыға күтеді.

С.БИСЕНОВ.